Balade 791 : En quel estat est vostre corps (MCLXXXIII)
Autre balade
En quel estat est vostre corps
Et quele est vostre maladie ?
― Certes je voudroie estre mors,
Car en grant tristesce mendie :
5 Veue n’ay, parole n’oye
Dont je me puisse conforter,
Mais ce me fait desconforter
Que j’ay oeulx, bouche, oreille mole,
Si[1] ne puis vir, oir, parler :
10 Je ne voy, n’oy ne ne parole,
Fors que j’enten par [le] dehors
Un grant bruit en ma fantasie,
Et me semble que li plus fors
Veult au foible touldre la vie,
15 Et qu’Orgueil, Avarice, Envie
Font Division assembler,
Les bons et les saiges trembler
Par Detraction, qui est fole.
Mais quant je laisse le resver,
20 Je ne voy, n’oy ne ne parole.
Helas ! Phisique, est il confors
Qui sauvast ma clarté perie
Et mes dolours, qui sont si fors ?
― Ouil. Verité en partie,
25 Vray Amour, Humilité lie,
Union, Justice garder,
Craimdre Dieu. Ceuls puelent oster
De toy tout le mal qui t’afole. 315c
― Je muir : d’eulx ne pourray finer :
30 Je ne voy, n’oy ne ne parole.
L’envoy
Medicin, vueilléz moy donner
Autre confort. ― Va reposer
Pacience embrase et acole,
Ne te chaille de recouvrer.
35 Je ne voy, n’oy ne ne parole.[2]
[1] Ms. Et si
[2] Note de Saint Hilaire : Entre les deux derniers vers se trouve écrit : ces trois mos
