Balade 790 : A tous ceuls qui ont de quoy vivre (MCLXXXII)
315a
Balade
A tous ceuls qui ont de quoy vivre,
Hors la court des princes royaulx
Qui s’i[1] tiennent, que l’en delivre.
Moult vivent de doubteus morseaulx,
5 Se paie ne se fait d’iceaulx,
Eulx saichans, par leur souverain.
Ilz en sont tenuz pour certain
Ou d’aler vivre en leur maison,
Quant la court chargent soir et main :
10 Mais nul n’a cure de raison.
Plus en y a, plus faut qu’om livre
Beufs, moutons, pors, volille, veaulx,
Vins, grains et foings. Poise a la livre
Buche et charbon, poisson vaisseaulx,
15 Sel, espices, cire, trousseaulx
De coustes de linge et d’estrain,
Vaisselle d’argent ou d’estain,
Dont il fault faire garnison,
Prandre a croire, ou paier a plain :
20 Mais nul n’a cure de raison.
Et puis que tout s’escript en livre,
S’on ne paie, ceuls sont loyaulx
Qui de telz morseaulx ne sont yvre,
Mais vont mangier de leurs poureaulx
25 En leurs hostelz. La court par eaulx
N’a charge, lors s’en sont plus sain
D’ame et de corps. Moins fault de pain
A court et vivres, ce scet on,
Que se l’ostel fust de gent plain :
30 Mais on n’a cure de raison.
L’envoy
Princes, tenéz droicte la main
Que voste hostel soit net et sain.
Paiéz bien en toute saison. 315b
En restraingnant sachiéz vo frain
35 Selon les cas, trop la fin crain :
Mais nul n’a cure de raison.
[1] Saint Hilaire corrige en Qu’ils se
