Balade 789 : Ainsi qu’Eve, par la trasngrescion (MCLXXXI)
Balade morale
Ainsi qu’Eve, par la trasngrescion 314e
Du fruit manger que Dieux ot deffendu,
Adam aussi, vint la perdicion
De leurs enfans qui furent confondu,
5 Fut cause et chief, quant elle ot offendu,
Que leur lignie alast aux infernaulx,
Tous condempnéz par long temps pour leurs maulx,
Femme depuis repara ce dommaige,
Car en Marie descendit Dieux li haulx :
10 Toute paix vint par un saint mariaige.
Par femme fut la grant dissencion
Dont maint pais est gasté et perdu[1]
Entre les gens de l’isle d’Albion
Et de Gaule. Tous deux s’en sont sentu.
15 Maint prodomme pour leur guerre mouru
Es batailles, es sieges, es[2] assaulx,
En divers lieux et encor dure entr’aulx
Celle rumeur pour terre et heritaige.
Si seroit bon d’appaisier leurs travaulx :
20 Toute paix vint par un saint mariaige.
Que femme aussi de la cognacion
Du roy des Frans, bonne et belle en vertu,
Fust requise pour mettre en union
Ces deux regnes, si comme autrefoiz fu
25 Du roy anglois, pour eschiver le fu,
Mort et peril d’eulx et de leurs cassaulx,
De leurs pais et peuples principaulx,
Pour l’amour Dieu, veu qu’ilz sont de linaige.
Du contraire ne croient leurs consaulx :
30 Toute paix vint par un saint mariaige.
L’envoy
Princes royaulx, de bonne affection
Queréz la paix et reformacion
De voz subgiéz, et vous feréz que saige, 314d
Par le traittié d’umble conjunction,
35 S’estes tout un, ne doubtéz nacion :
Toute paix vint par un saint mariaige.
Explicit
[1] Ms. destruit perdu
[2] Ms. et es
