Balade 787 : Loy tenir, science et justice (MCLXXIX)
Autre balade
Loy tenir, science et justice,
Font royaumes perpetuer,
Mais il fault que regne perice
Ou l’en ne seult ces poins garder.
5 Encor doit uns roys regarder
Au bien commun sur toute chose,
Et qu’en tout bien son corps dispose
Pour exempler tous ses subgés.
Qu’il soit a la deffense prés
10 De son regne, s’il a afaire.
Pieux aux povres, durs aux mauvés :
Ainsi doit tout vaillant roy faire.
Qu’il ayme Dieu et son service
De vray cuer, sanz ypocriter, 314a
15 Et qu’il ait en chascun office
Homme habile pour l’exercer,
Selon l’estat, sanz exceder
Le nombre. Que nul n’en despose
Se cause n’a, car je suppose
20 Que les muer est par exprés
Son grant dommaige, pour les frés
Des nouveaulx apprandre et attraire.
Congnoisse ses gens et leurs fés :
Ainsi doit tout vaillant roy faire.
25 Ait chier les bons, les maulx pugnice,
Les saiges clers doit ordonner
Aux drois civilz, la sont propice
Pour les plaiz et causes mener.
Les chevaliers pour gouverner
30 Sa guerre, car corps y expose
Chascuns d’eulx. Clers ce faire n’ose.
Face donc de ceuls ses attrés
Qui portent la charge et surfés
De sa guerre, et en cest affaire
35 Les croie, et rende leurs bienfés.
Ainsi doit tout vaillant roy faire.
L’envoy
Princes, qui veult riches regner
Doit ses offices ramener
A nombre, par bon exemplaire,
40 Les dons et gaiges recoupper
Excessis, et les moderer :
Ainsi doit tout vaillant roy faire.
