Balade 784 : Enfans, enfans, de moy, Adam, venus (MCLXXVI)
Autre balade
Enfans, enfans, de moy, Adam, venus,
Qui aprés Dieu suis peres premerain,
Creé de lui, tous estes descenduz
Naturelment de ma coste et d’Evain.
5 Vo mere fut. Comment est l’un villain
Et l’autre prant le nom de gentillesce
De vous, freres ? Dont vient tele noblesce ?
Je ne le sçay, se ce n’est des vertus,
Et les villains de tout vice qui blesce :
10 Vous estes tous d’une pel revestus.
Quant Dieu me fist de la boe ou je fus,
Homme mortel, foible, pesant et vain,
Eve de moy, il nous crea tous nuz,
Mais l’esperit nous inspira a plain
15 Perpetuel, puis eusmes soif et faim,
Labour, dolour, et enfans en tristesce.
Pour noz pechiéz enfantent a destresce
Toutes femmes. Vilment estes conçuz.
Dont vient ce nom, villain, qui les cuers blesce ?
20 Vous estes tous d’une pel revestuz.
Les roys puissans, les contes et les dus,
Li gouverneur du peuple et souverain,
Quant ilz naissent, de quoy sont ilz vestuz ?
D’une orde pel. Sont ilz d’autres plus sain ?
25 Certes nenil, mais seufrent soir et main,
Froidure et chault, mort, maladie, aspresce,
Et naissent tous par une seule adresce
Sanz excepter grans, petiz ne menuz.
Se bien penséz a vo povre fortresce,
30 Vous estes tous d’une pel revestuz. 313b
L’envoy
Prince, penséz, sanz avoir en desdain
Les povres gens, que la mort tient le frain.
[…][1]
[1] L’envoi semble incomplet
