Balade 782 : Laissiéz le chant de la geole (MCLXXIV)
Balade
― Laissiéz le chant de la geole
Ce dist une pie a un gay,
Sanz contrefaire vo parole.
Chascun a son chant comme j’ay,
5 Naturel. Des oiseaulx ne sçay
Pour quoy ils changent leur nature,
Sinon pour la douce pasture
Qu’ilz quierent en l’ostel des roys,
Dont ilz ont puis maladventure :
10 Chantons au vray le chant du boys.
Car l’autre chant tue et affole
Maint rossignol et papegay,
Et tout menu oisel qui vole.
Car deux langues ont, c’est tout vray,
15 L’une du bois qui prant au glay
Les oyseauls, et a la froidure
Par leur appel, quant l’iver dure,
Les font venir dedenz la roix,
Prandre et tuer. C’est grant injure :
20 Chantons au vray le chant du boys.
L’autre langue est mauvaise et mole,
Quant elle ne veult dire vray,
Mais consent, com mauvaise et fole,
Par convoitise, et veu l’ay
25 Que li oisel sont en esmay
Prins et plumé, par leur laidure.
Ainsis oiseauls se desnature.
Au jour d’uy n’est raisons ne drois.
Laisson tel chant et tele ordure,
30 Chantons au vray le chant du boys.
L’envoy
Prince[1], on pourroit ceste figure
Mettre sur mainte creature
Qui chante chascune deux foys.
Car maint n’ont de loyaulté cure :
35 Laissons convoitise et murmure,
Chantons au vray le chant duu boys. 312d
[1] Ms. Princes
