Balade 781 : Douce, plaisant, courtoise et saige (MCLXXIII)

Autre balade

                        Douce, plaisant, courtoise et saige,                                                   312b
                        Belle, que chascun doit amer,
                        Humble en parler, de doulz langaige,
                        En vostre cuer n’a point d’amer.
5                      Il n’a, deça ne dela mer,
                        Dame tant de chascun amee :
                        Si ne devéz homme doubter.
                        ― Grans mercis, je suis bien armee.

                        ― Qu’est ce a dire ? C’est un usaige
10                    Qu’entre vous avéz de parler,
                        Par une maniere sauvaige,
                        Car vostre los vault un blamer.
                        Faut il donc les dames armer ?
                        Avéz vous guerre a eulx trouvee ?
15                    ― Non. Vo regart me fait trembler.
                        ― Grans mercis, je suis bien armee.

                        ― Ha ! dame de noble couraige,
                        Nulz ne vous pourroit trop louer
                        Vo doulz maintien, vo gent corsaige.
20                    Vous sçavéz venir et aler,
                        Gens requeillir, gens saluer.
                        Vous fustes de bonne heure nee,
                        On ne pourroit meilleur trouver.
                        ― Grans mercis, je suis bien armee.

                        L’envoy

25                    Prince, il fault les dames garder
                        De ces armeurs, et regarder
                        Que chascune ait cote aceree
                        Des or mais pour son corps sauver.
                        ― Au fort, qui me vouldra grever,
30                    Grans mercis, je suis bien armee.