Balade 780 : Vous estes gracieus et beaux (MCLXXII)

Autre balade

                        Vous estes gracieus et beaux,                                                            312a
                        Jeusnes, appers, courtois, jolis,
                        Vous avéz la grace, de ceaulx
                        Qui vous voient, d’estre soutils,
5                      Courageus estes et hardis
                        Et plus fors que n’est uns lions.
                        ― Dieu vous le rende, doulz amis :
                        Vous arméz bien les compaingnons.

                        ― Les chiens améz et les oiseaulx,
10                    Les dames honouréz toudis,
                        Vous estes saiges et loyaulx,
                        Prodoms, vaillans. Voz ennemis
                        Vous craingnent fort. Le los et pris
                        Avéz en tous lieux d’estre bons.
15                    ― Ha ! sire, que je vous ay quis !
                        Vous arméz bien les compaignons.

                        ― Legiers estes comme uns chevreaulx,
                        Larges, a honnour ententis.
                        Vous donnéz argent et joyaulx,
20                    De voz biens n’est nulz escondis.
                        De vous parlent en paradis
                        Tous les sains, pour voz larges dons.
                        ― Dieux le vous mire, et grans mercis :
                        Vous arméz bien les compaignons.

                        L’envoy

25                    Prince, bon fait avoir advis
                        Que l’en ne croie pas les dis
                        De telz armeurs de champions,
                        Car ilz tendent a leurs proufis.
                        S’il mentent, respondéz ainsis :
                        Vous arméz bien les compaignons.