Balade 779 : Bons compains fut, de dolente heure né (MCLXX)

Autre balade

                        Bons compains fut, de dolente heure né
                        Qui en tous cas fait d’autrui l’appetit.
                        De jour, de nuit, est prest et ordené
                        Pour un chascun, ne sçay comment il vit.
5                      Il suist le grant, le moien, le petit
                        Et ne sçaroit nul bon homme escondire,
                        Et neantmoins un proverbe si dist
                        Que bon compains a trop sur lui a dire.

                        Se largesce a, trop est habandonné.
10                    S’il est eschars, li meschans se defrit.
                        S’il est jolis, c’est ce qui l’a gasté.
                        S’il jeue aux dez, c’est ce qui le honnit.
                        Bon compaignon a tousjours un mesdit
                        De qui que soit, dont talent n’ay de rire,
15                    Mais me merveil qui trova tel edit
                        Que bons ocmpains a trop sur lui a dire.

                        Se cent biens a dont il soit renommé,
                        Bons compains est, mais [se] trop s’apovrit,
                        L’autre dira : ― Je le vi bien amé.
20                    ― Vous dittes voir, mais trop fort s’enviellit.
                        Bons compains a, de quoi c’est grant despit,                                    311c
                        Tousjours un mais[1] pour son bien contredire.
                        Laissons ce mais, et panduz soit qui fit
                        Que bons compains a trop sur lui a dire.

                        L’envoy

25                    Princes, par Dieu ! c’est un [bien] grant despit
                        D’ainsi vouloir son compaignon mesdire :
                        Si vous suppli qu’a tous soit contredit
                        Que bons compains a trop sur lui a dire.

[1] Ms. mors