Balade 778 : Il a cinq ans que mes corps ne cessa (MCLXVIII)
Balade au Roy nostre sire
Il a cinq ans que mes corps ne cessa
De poursuir, d’impetrer mandemens,
Boiste porter puis de la, puis de ça,
Et s’avéz fait pluseurs commandemens
5 Aux generaulx, de bouche et par voz gens,
Que de voz dons fusse sactifiéz,
Dont riens n’ont fait, dont pas [je] ne suy liéz.
Mis m’avoient a la fin de juillet,
Mais nonpourquant je suy touz oubliéz :
10 En si faiz dons mauvais fier se fet.
Les .xii. moys, dont janvier commença,
Ay par termes obtenuz susequens. 310d
J’oy jours et ans, la Toussains qui passa,
La Chandelour, Nouel et les Advens,
15 Caresme aussi, Pasques commeniens,
L’Ascension, mes dons verifiéz,
La Panthecouste, et sanz estre paiéz,
M’ont mainte foiz assigné au souflet.
Les generaulx, fiéz vous y, fiéz !
20 En si faiz dons mauvais fier se fait[1].
Et puis qu’ainsi d’eulx poursuir me va,
Je ne plains riens que ma paine et despens :
A vous en est. Plus ne les poursuira
Mon las de corps, qui a servi long temps
25 A vo plaisir. Lettres et dons vous rens,
Car vous estes souverains d’eulx et chiefs.
J’en seroie content, se vous vouliéz.
Vo grace lors feroit finer mon plet,
Qui, se par vous n’est reconciliéz,
30 En si faiz dons mauvais fier se fet.
L’envoy
Princes, soiéz de voz dons recordans
Et de voz diz, l’un a l’autre acordans :
En vo grace de tous poins me soubmet.
35 Deuz me sont voz dons depuis cinq ans,
Mais, se sur eulx n’ay mes .iiii. frans,
En si faiz dons mauvais fier se fait[2].
[1] Saint Hilaire corrige en fet
[2] Saint Hilaire corrige en fet
