Balade 777 : He ! Dieu, quel temps et quel regne de monde (MCLXVII)
Autre balade
He ! Dieu, quel temps et quel regne de monde
Court au jour d’ui par tout generalment,
Ou je ne voy vray cuer, pensee monde,
Pité, amour ne certain jugement,
5 Garder la loy, faire son sauvement,
Honourer Dieu ne doubter sa puissance !
Mais de touz maulx voy la perseverance
Es corps mortelz, en convoitant toudis
Fausses honeurs, dignitéz et chevance,
10 Qu’a nul ne chaut d’Enfer ne Paradis.
Pierres et Polz, ou l’eglise se fonde,
Gouvernerent a leur temps sainctement,
Preschans la foy et menans vie ronde,
Crurent la loy par leur enseignement,
15 Par exemple de bon gouvernement. 310c
Mais arrebours voy retourner la dance,
Vendre, achater, mettre en desordonnance
Les biens de Dieu. Autrement que jadis
Estat lever, orgueil, oultrecuidance,
20 Qu’a nul ne chault[1] d’Enfer ne Paradis.
Aux princes voy par tout lever la bonde
Sur les pechiéz, et convoiteusement.
Sanz verité voy le chant de l’aronde.
Justice faint. Je voy communement,
25 Pour decepvoir, que cil qui parle ment.
Chascun user veult de fole plaisance.
En tous estas ne voy que decepvance,
Blandir devant, derrier estre ennemis,
Pour acquerir seignourie ou finance,
30 Qu’a nul ne chaut d’Enfer ne Paradis.
L’envoy
Princes, penséz a l’estat de vaillance,
De servir Dieu, d’avoir bonne ordonnance,
Et touz autres gardent leurs esperis,
Car tout mourra. Laissons perseverence
35 De noz pechiéz, ou tout est en balance,
Qu’a nul ne chault[2] d’Enfer ne Paradis.
[1] Saint Hilaire corrige en chaut
[2] Saint Hilaire corrige en chaut
