Balade 776 : Vous qui vouléz l’ordre de chevalier (MCLXV)

Autre Balade

                        Vous qui vouléz l’ordre de chevalier,                                               309d
                        Il vous convient mener nouvelle vie,
                        Devotement en oroison veillier,
                        Pechié fuir, orgueil et villenie.
5                                  L’Eglise devéz deffendre,
                        La vefve aussi, l’orphenin entrprandre,
                        Estre hardis et le peuple garder,
                        Prodoms, loyaulx, sanz riens de l’autrui prandre :
                        Ainsi se doit chevalier gouverner.

10                    Humble cuer ait, toudis doit traveillier
                        Et poursuir faiz de chevalerie,
                        Guerre loyal, estre grant voyagier,
                        Tournoiz suir, et jouster pour s’amie.
                                    Il doit a tout honnour tendre,
15                    Si c’om ne puist de lui blasme reprandre
                        Ne lascheté en ses œuvres trouver.
                        Et entre touz se doit tenir le mendre :
                        Ainsi se doit chevalier gouverner[1].

                        Il doit amer son seigneur droiturier,
20                    Et dessus touz garder sa seignourie,
                        Largesce avoir, estre vray justicier,
                        Des prodommes suir la compaignie,
                                    Leurs diz oir et aprandre,
                        Et des vaillans les prouesces comprandre,
25                    Afin qu’il puist les grans faiz achever
                        Comme jadis fist le roy Alixandre :
                        Ainsi se doit chevalier gouverner.

[1] Ms. gouverner chevalier