Balade 775 : Ou temps que l’en seult plus hault tendre (MCLXIII)
Autre balade
Ou temps que l’en seult plus hault tendre,
Et c’om est en plus grant escueil,
Que l’en veult tout ravir et prandre
Et tout surmonter par orgueil,
5 Adonc sont aveugle li œil,
Et lors vient fortune soudaine
Qui tel orgueil bat et ramaine
Par pechié a confusion :
Onques personne d’orgueil plaine
10 Ne prinst bonne conclusion.
Exemple du roy Alixandre,
Qui soubmist le monde a son vueil
A. xxx. ans, puis voult guerre prandre
Aux Enfers, et lors vint son dueil.
15 Car la poison passa le sueil
De sa convoitise villaine.
Ainsis la mort courant le maine
Et sur heure a destruction.
Qu’onques personne d’orgueil plaine
20 Ne prinst bonne conclusion.
Nebugodonosor emprandre
Voult contre Dieu, mais le verreil,
Que nul, fors lui, ne puet comprandre,
Le casse en pouldre. Si dueil
25 Descongnoissance et son acueil,
Qui destruit Troye premeraine,
Nynive, Romme souveraine,
Babiloine, autre region,
Qu’onques personne d’orgueil plaine
30 Ne prinst bonne conclusion.
L’envoy
Prince, de fortune mondaine 309b
Ou de mort soit toute certaine
Creature en elacion,
35 Qu’onques personne d’orgueil plaine
Ne prinst bonne conclusion.
