Balade 586bis : Dame, bon jour vous soit donnéz (MCLIX)

Autre balade[1]

                        Dame, bon jour vous soit donnéz !
                        ― Beau filz, bien soies tu venus !
                        Que quiers tu ? ― Que vous m’enseigniéz
                        Comment je seray soustenus.
5                      ― Je t’enseigneray trois vertus,
                        Le sens naturel et l’acquis,
                        Et maniere est au pardessus :
                        Aies sur ces poins ton advis.

                        Moult est bons li sens naturelz
10                    Qui vient aux hommes de ça jus
                        Naturelment, puis qu’ilz sont nez,
                        Qui par leur sens se mettent sus.
                        Le sens acquis proffite plus
                        Quant au naturel est unis.
15                    Maniere vault mieulx, si conclus :
                        Aies sur ces poins ton advis.

                        Qui a ces trois yert ordonnéz
                        En tous biens sera maintenus,
                        Temporelz, espirituelz.
20                    Or ne soies pas malostrus.
                        Quier les donc. N’en soies exclus,
                        Le monde aras et paradis
                        Se tu les as bien retenus :
                        Aies sur ces poins ton advis.                                                              308a

                        L’envoy

25                    ― Raison, dame, vous m’aprenéz.
                        Vostre suis, tant com seray vis,
                        Disciples. ― Bien seras fondéz :
                        Aies sur ces poins ton advis.

[1] Pièce identique au f° 242 sous le n° DCCCCXXXV