Balade 62ter : Vous qui estes paréz comme espousee (MCLVII)

Balade[1]

                        Vous qui estes paréz comme espousee,
                        Qui des grans faiz si bien parler sçavéz,
                        Et qui sur tous avéz la renommee
                        D’estre jolis, qui chantéz et dancéz,
5                      Et qui les faiz des grans choses penséz,
                        Quant en France est chascuns, en son pais,
                        Vecy Honeur, se querre la vouléz :
                        Vous n’estes pas sur Grant Pont a Paris.

                        Veoir pouéz du roy Charle l’armee
10                    Monter en mer. Sur ce vous adviséz.
                        Servéz le bien de cuer et de pensee,
                        Faittes vers lui ainsis que vous devéz.
                        Aiéz bon cuer quant vous arriveréz,
                        Et que chascuns soit vaillans et hardis,
15                    Si qu’en la fin nulz ne soit diffaméz :                                                307c
                        Vous n’estes pas sur Grant Pont a Paris.

                        Vous vous boutéz en l’anglesche contree
                        Pour conquerir ce que perdu avéz.
                        ― Qu’est ce ? ― Renom, dont vo terre honouree
20                    Fut par long temps. Donques la recouvréz,
                        Et s’en bataille ou assault vous trouvéz,
                        Monstréz voz cuers plus grans que voz habis.
                        Ou autrement seriéz deshonouréz :
                        Vous n’estes pas sur Grant Pont a Paris.

                        L’envoy

25                    Prince, tous ceuls qui sont les mieulx paréz
                        Quant a l’oneur soient les premies mis.
                        Aviséz bien que fort vous combatéz :
                        Vous n’estes pas sur Grant Pont a Paris.

[1] Pièce identique au f° 15 sous le n° LXII et au f° 242 sous le n° DCCCCXXXII