Balade 772 : Pour quoy fina par venin Alixandre (MCLV)
Balade comment Alixandre le grant qui tant de pais conquesta mourut par venin, et coment Julius Cesar, Pompee, Jason qui conquist la Toison d’or, Agamenon et le preux et vaillant Hector de Troye ne porent contester a leur mort et que toudis advient tout ce qui doit advenir
Pour quoy fina par venin Alixandre,
Qui si puissans fut et si fortunéz,
Qui le monde soubmist en aige tendre, 306d
Et commença .xv. ans puis qu’il fut nez
5 A conquerir ? Comment fut destinéz
Cilz qui conquist Jude, ce fut Pompee ?
Aprés Thessalle ot la teste couppee,
En Egipte le fist ly roys fenir
Tholomeus, par traison dampnee :
10 Toudis advient ce qui doit advenir.
Comment osa Jason la Toison prandre ?
Ly premiers fut qui fist faire grant nefs.
Comment osa ravir ne entreprandre
Helaine puis Paris li forsenéz ?
15 Troye, Ylion en furent deffinéz,
Hector li preux, destruite la contree.
Agamenon, Gregois et leur armee,
Destruirent tout. Mais a leur revenir
Perirent tuit, po de gent exceptee :
20 Toudis avient[1] ce qui doit advenir.
Julles Cesar auquel Romme voult rendre
Comme empereur triumphe et dignitéz,
Qui saige fut ne se sceut pas deffendre,
Et si tenoit lettres des conjuréz
25 Encontre lui, qu’il ne fust mors ruéz
Si tost qu’il fist ou Capitole entree.
Est ainsis donc a chascun destinee
Sa vie ou mort, de perdre ou conquerir ?
Je croy qu’oil. Chascuns a sa journee :
30 Toudis advient ce qu’il[2] doit advenir.
L’envoy
Princes, je tien quant a la loy donnee
Que Franc Vouloir se puet contretenir
Mais quant au ciel de sa cause causee,
Toudis advient ce qu’il[3] doit advenir.
[1] Saint Hilaire corrige en advient
[2] Saint Hilaire corrige en qui
[3] Saint Hilaire corrige en qui
