Balade 771 : Angleterre est une isle d’Occident (MCLIV)

Autre balade

                        Angleterre est une isle d’Occident
                        Qui premier fut Albion appelee.
                        D’Albos est dit, car la terre evident                                                   306c
                        Pour sa blancheur est en mainte contree.
5                      Mainte falize a sur la mer posee
                        Haulte et blanche, dont mainte region
                        La puet veoir. Pour ce ainsi fut nommee :
                        C’est de ce mot l’interpretacion.

                        Bretaingne fut aprés, en descendant,
10                    D’un duc Bruthus, de Troye la gastee,
                        Qui la conquist, nommee en succedant.
                        Adonc estoit l’Isle aux Geans clamee.
                        Et cilz Brutus mena la son armee
                        Et les geans mist a destruction.
15                    De Brutus fut grant Bretaingne appellee :
                        C’est de ce mot l’interpretacion.

                        Long temps aprés vint la un accident
                        Par les Saxoins Anglés. car appellee
                        Fut d’Angela, fille a un duc puissant
20                    De Saxoine, celle terre loee.
                        Conquise l’a, Bretons mis a l’espee,
                        Et fist illec son habitacion.
                        D’Angela ont Anglés la renommee :
                        C’est de ce mot l’interpretacion.