Balade 770 : Trop me merveil que devient Congnoissance (MCLIII)

306b

Autre balade comment congnoissance souloit bouter avant les haulz cuers et eslieve a present les chetis

                        Trop me merveil que devient Congnoissance,
                        Qui les haulz cuers souloit avant bouter
                        Et les saiges par longue experience,
                        Que je lui voy de tous poins rebouter.
5                      Les chetis voy es estas eslever,
                        Taire le voir, essaucier le mentir :
                        Qu’en advient il, a tout considerer ?
                        C’est ce qui fait le monde anientir.

                        Nulz n’est prisiéz s’il n’a grant apparance
10                    Et par dehors, sanz dedenz regarder
                        Le bien, l’onneur, le sens et la vaillance
                        Que l’en deust devant tout preferer.
                        Entre le bien et le mal differer
                        Devroit chascun, et le bien soustenir,
15                    Mais le mal voy plus que le bien regner :
                        C’est ce qui fait le monde anientir.

                        Humilité n’a plus son ordonnance.
                        On tient vaillant qui se scet bel armer,
                        Honouréz est qui amasse finance,
20                    Saige est tenu qui se scet bien fourrier.
                        Vertu n’a lieu, qui ne se puet monstrer.
                        Grans en estat et haultains maintenir,
                        Taire le voir et mençonge acorder :
                        C’est ce qui fait le monde anientir.

                        L’envoy

25                    Princes, depuis qu’om laissa a amer
                        Povres vaillans et les saiges cherir
                        Et que l’en voult les chetis honourer,
                        C’est ce qui fait le monde anientir.