Balade 769 : Se ceuls qui ont tant de maulx pour amer (MCLII)
Balade sur ceuls qui faingent estre amoureux de chascune et jurent qu’ilz ont tant de maulx pour amer qu’il les convient mourir, chascun jour, de diverses mors
Se ceuls qui ont tant de maulx pour amer,
Comme ilz dient, en avoient le quint,
De cent les deux n’en pourroit eschaper 306a
Mais en mourroit, chascun jour, plus de vint.
5 De tel amour oncques ne leur souvint,
Fors qu’ilz cuident en parlant decepvoir,
Et en jurant qu’om croie qu’il soit voir
Ce qu’ilz dient, mais au cuer ne leur touche :
Dont tous telz maulx faingnans puissent avoir
10 Faulx amoureus et de cuer et de bouche.
Les uns dient qu’ilz ne font que trambler,
Que doulz regart de male heure les print.
L’autre ne puet dormir ne reposer,
Li cuers li art, puis qu’Amours le sousprint
15 Soudainement, qu’ardant desir lui vint
Pour la beauté qui trop le fait douloir.
Et l’autre meurt quant il n’a son vouloir,
Il sue sang et ses tourmens reprouche :
En languissant se fait telz apparoir
20 Faulx amoureus et de cuer et de bouche.
Et quant dames oient ainsis parler
Tel qui onques a une ne se tint
Mais a pluseurs va pour elles tempter,
Comme un marchant ayant le cuer estint,
25 Qu’a vraie amour onq telz vices n’avint
Que de changier et ainsi decepvoir,
Voisent a Dieu, faictes vostre devoir
De rebouter leur mal et leur reprouche :
Ainsis pourront leur folie percevoir
30 Faulx amoureus et de cuer et de bouche.
L’envoy
Prince[1], on ne doit nulz croire pour jurer
De leur amour, car en eulx n’a qu’amer,
Ce sont de ceuls qui vont a l’escarmouche
Pour y cuider quelque chose happer :
35 Au temps qui est, telz se veulent monstrer
Faulx amoureux et de cuer et de bouche.
[1] Ms. Princes
