Balade 768 : Fille que j’ay, puis que vous fustes nee (MCLI)
Balade comment le pere marie sa fille et lui donne terre, or et joyaulx, en elle introduisant estre humble, douce, courtoise et de bonnes meurs
Fille que j’ay, puis que vous fustes nee
Orphenine de mere deffaillant,
.Xvii[1]. ans nourrie et gouvernee
A mon pouoir bien et honnestement.
5 Lettres monstré, aprins vo sauvement,
Et vous m’avéz comme pere obey,
Et par aage vous ay donné mary,
Terre et argent, comme pere doit faire,
Pour hoirs avoir : je vous requier et pri,
10 Soiéz humble, courtoise et debonnaire. 305d
Honouréz Dieu de cuer et de pensee,
La Vierge aussi servéz devotemment,
La messe oéz, et chascune journee
Graciéz Dieu de vostre advancement,
15 Et li priéz de cuer treshumblement
Qu’il vous doint fruit dont puist estre servi,
Et qu’il vous gart des las de l’ennemi,
Si qu’a pechié nul ne vous puist attraire,
Et que de ce puissiéz avoir l’octri :
20 Soyéz humble, courtoise et debonnaire :
Donnéz pour Dieu, soiéz po enparlee,
A vo mari ferme et obeissant,
Sobre en tous cas, prode femme trouvee.
Gardéz voz corps de foul atouchement.
25 En vostre hostel sait bon gouvernement,
Adviséz bien que riens n’y soit peri.
Soit le bestail gouverné et nourri,
Faictes les beufs et chevaulx aux champs traire
Pour les labours. Aux mesgnies aussi,
30 Soiéz humble, courtoise et debonnaire.
L’envoy
Fille, au depart et a vo bien alee,
Qui par mari estes de moy sevree,
Vueilliéz en bien a vo mere retraire
Tant que de vous, qui bien vous ay amee,
35 Ne soit nul jour male chançon chantee :
Soyéz humble, courtoise et debonnaire.
[1] Saint Hilaire corrige en .X. et .vii.
