Balade 767 : Je me donne grant merveille (MCL)

Autre balade

                        Je me donne grant merveille
                        D’omme qui doit estre saige,
                        Qui fille a, blonde et vermeille,
                        Quant pour mettre en mariaige
5                      Et tollir son pucellaige
                        Donne du sien largement
                        A un mauvais garnement,
                        Ou bon compains la prandroit
                        Voluntiers et liement,
10                    Qui de largent lui donrroit.

                        Ce fait la loy qui conseille
                        Aux foulz peres cest usaige,
                        Dont maint d’iceulx se traveille
                        D’y mettre son heritaige.
15                    Quant trouver puet d’avantaige
                        Qui laboure son enfant,
                        Pour quoi veult il chierement
                        Lui pour ce ferrer estroit
                        Quant trouver puet promptement                                                    305c
20                    Qui de l’argent lui donrroit ?

                        Je ne sçay folour pareille.
                        Peres despent a oultraige
                        Qui a belle fille, et veille
                        Pour faire son labouraige.
25                    Ja n’y mette argent ne gaige.
                        Prangne la tout franchement
                        Qui la veult, non autrement.
                        Peres rien donner n’y doit,
                        Quant il scet certainement
30                    Qui de l’argent lui donrroit.

                        L’envoy

                        Princes, peres fait oultraige
                        Qui fille a, et son dommaige.
                        Se belle est, il se deçoit
                        De donner a biau visaige.
35                    Homme aroit bien de paraige
                        Qui de l’argent lui donrroit.