Balade 766 : Je ne croy par mon jugement (MCXLIX)
Balade
Je ne croy par mon jugement
Qu’il soit plus grant merencolie,
Sanz mal du corps et sanz tourment,
Que d’omme qui fille marie
5 En estat de chevalerie,
De clerc, de bourgois ou de lay.
Par ma fille bien aprins l’ay
Qui m’a rungié jusques aux os.
Pour ce a ceuls qui fille ont diray :
10 Qui fille a n’est pas a repos.
Terre lui fault premierement
A tousjours, non pas a sa vie,
Robes, joyaulx, or et argent,
Pannes, draps d’or et pierrerie,
15 Manteaulx, anneaulx, peleterie,
Menu ver, gris, chapel d’or gay,
Fronteaulx, couronne : hé Dieu, quel glay !
Vaisselle, plas, escuelles, pos.
Jamais fille ne mariray :
20 Qui fille a n’est pas a repos.
Court et long fault maint garnement, 305b
Grans noces faire et chiere lie,
Menestrelz de maint instrument
Pour esbatre la compaignie,
25 Et si fault qu’elle soit fournie
De chambres, de liz, c’est tout vray,
Et de beau linge. Je ne scay
Comment les peres sont si sos.
J’en suis ratains jusqu’au hahay :
30 Qui fille[1] a n’est pas a repos.
L’envoy
Princes, cellui qui fille prant
Est plus joieux communement
Que li peres, qui plaint son dos,
Quant le fais et la charge en sent.
35 Nulz ne puet sçavoir, s’il n’aprant :
Qui fille a n’est pas a repos.
[1] Ms. filles
