Balade 765 : Depuis Nembroth qui acquist seignourie (MCXLVIII)
Autre balade
Depuis Nembroth qui acquist seignourie
Premierement pour les loges garder,
Du temps des Grieux de Troye, l’exillie
Babiloine, que Cirus voult gaster,
5 Qu’Alixandre fist le monde trembler
Et le soubmist et subjuga par guerre,
Les Rommains, puis ne fut veu en terre
Tant de doleurs et de male meschance
Qu’on a veu partout courir et querre
10 Pour le debat d’Angleterre et de France.
Tant ne dura la guerre d’Asyrie
Ne des Tartars, ou pais d’oulre mer,
Ne la loy Dieu ne fut plus dommagie
Que par ces deux pour la guerre mener,
15 Pays destruis, les temples violer,
Ardoir, ravir et l’un l’autre requerre.
Par .lx. ans, qui bien en veult enquerre,
Sanz paix avoir, regne tel pestilence
En mains pais tuer, murdrur qui erre,
20 Pour le debat d’Angleterre et de France.
Estre devront bien ou livre de vie
Qui bonne paix final sçauront trouver
Entre des deux, faire l’Eglise unie. 305a
Par ce pourront le monde reformer,
25 En trestous biens leurs noms perpetuer
En bon renom, qui par tout le monde erre,
Et s’en pourront la gloire Dieu acquerre.
A tousjours mais feray d’eulx remembrance
En mon livre que j’ay encloz soubz serre,
30 Pour le debat d’Angleterre et de France.
L’envoy
Princes, vueilliéz a la paix labourer
Et les .ii. roys s’i vueillent acorder
Sanz convoiter or, terre ne finance,
Ne facent plus le monde deserter
35 Ne les peuples mourir et tourmenter
Pour le debat d’Angleterre et de France.
