Balade 764 : Sires qui veult faire aucun maçonnaige (MCXLVII)

Autre balade

                        Sires qui veult faire aucun maçonnaige
                        Doit son vouloir aux maçons descouvrir,
                        Aux charpentiers parler du charpentaige
                        Et aux couvreurs marchander de couvrir,
5                      Ne pas ne doit telle matere ouvrir
                        Aux vignerons, qui ne scevent que c’est,
                        Ne bon conseil aux foles gens querir :
                        Chascun sçavoir doit ce que bon li est,

                        Et d’aviser en un chascun ouvraige,
10                    D’appeler ceuls qui le scevent fournir
                        Et non pas ceuls qui n’en scevent l’usaige.
                        Qui doit plaidier face advocas venir,
                        Par[1] ce pourroit sa besongne honnir.
                        Pour finances soient li changeur prest,
15                    Car par non sens puet maint mal advenir :
                        Chascuns sçavoir doit ce que bon li est.

                        Cilz qui guerre a ou doit combatre engaige                                     304d
                        Doit aux vaillans leurs consaulx requerir,
                        Aux chevaliers qui en armes sont saige
20                    Et qui scevent comment l’en doit ferir.
                        Par ceuls la doit aprandre et enquerir
                        Ce qu’il fera, car ceuls la sanz arrest
                        L’acompliront pour vivre et pour mourir :
                        Chascuns sçavoir doit ce que bon li est.

                        L’envoy

25                    Princes, qui a grant terre a maintenir
                        Quant sa guerre a, de s’oneur se desvest
                        Se ceuls ne croit qui le font soustenir :
                        Chascuns sçavoir doit ce que bon li est.

[1] Saint Hilaire corige en Sans