Balade 763 : Je qui vous ay en jeunesse servi (MCXLVI)
Autre balade
Je qui vous ay en jeunesse servi
De mon pouoir, fait a vostre plaisance,
Sanz convoitier, sanz estre remeri,
En attendant vostre bonne ordonnance,
5 Riche vous voy, seigneur, en grant puissance :
Souviengne vous de voz povres servens,
Ne les mettéz pour autre[1] en oubliance :
Pechié seroit et grant deffault de sens.
Mais je me doubt que pas ne soit ainsi,
10 Car oublier voy les servens d’enfance
Souventefoiz, et que plus sont joy
Les derreniers, c’est male acoustumance. 304c
Qui povre sert, quant riche a la chevance,
Remerir doit adonc ses povres gens.
15 S’ainsi ne fait, s’ilz avoient soufrance,
Pechié seroit et grant default[2] de sens.
Car cilz qui sert en povreté, cellui
Qui devient grans doit avoir congnoissance
De l’avancer, du mettre pres de lui
20 A son desceu, l’avoir en remembrance,
Faire du bien. Hé ! filz de roy de France,
De faire ainsis ne soiéz negligens :
S’en vous estoit d’eulx bien faire ignorance,
Pechié seroit et grant defaut[3] de sens.
L’envoy
25 Princes, soiéz de bonne pourveance
Sur vos estas, secouréz voz sergens,
Car autrement l’en diroit sanz doubtance :
Pechié seroit et grant defaut[4] de sens.
[1] Ms. autres
[2] Saint Hilaire corrige en deffault
[3] Saint Hilaire corrige en deffault
[4] Saint Hilaire corrige en deffault
