Balade 762 : Qui a bon cuer, pouoir et hardement (MCXLV)
Autre balade
Qui a bon cuer, pouoir et hardement,
Et volunté qui soit sur droit fondee,
Et il a gens a son commandement,
Qui vueille honeur, se guerre a, son armee,
5 Ne doit cesser, pour vent ne pour gelee,
Qu’il ne voise[1] son ennemi requerre :
Puis que sa gent soit de vivre ordonnee : 304b
Vaillant cuer puet en tous temps faire guerre.
Il ne fault pas muser si longuement
10 Qui conquerir veult aucune contree,
Le temps passer n’avoir son aisement.
Traveillier fault pour avoir renomme.
Richesce, honeur ne sera ja donnee
Au paresceus, car ien ne puet conquerre,
15 Ains pert toudis. Chose est determinee :
Vaillans[2] cuer puet en tous temps faire guerre.
Plus fait durs temps, plus ont d’espentement
Ceuls dessus qui la guerre est [or]donnee,
Et aux hardis voit on communement
20 Fortune avoir qui est bien fortunee.
Car quant plus est une chose doubtee,
Et meilleur fin li voit on souvent querre.
Ne doubtons rien, soit no vie asseuree :
Vaillans[3] cuer puet en tous temps faire guerre.
L’envoy
25 Princes, passéz sanz point de demouree :
Vostres sera le pays d’Angleterre.
Autre fois l’a un Normant conquestee :
Vaillans[4] cuer puet en tous temps faire guerre.
[1] Ms. voist
[2] Saint Hilaire corrige en Vaillant
[3] Saint Hilaire corrige en Vaillant
[4] Saint Hilaire corrige en Vaillant
