Balade 760 : Gelee, noif, montaigne ne valaige (MCXLIII)

Autre balade

                        Gelee, noif, montaigne ne valaige,
                        Bois ne desert, qui sentence y mettroit,
                        Ne divers pas ne beste tant sauvaige,
                        Que l’en ne puist efforcier qui vouldroit.
5                      Mais je ne croy qu’il soit engin ne droit
                        Que homs sceust faire, dire ou nommer,
                        Qui contester peust en nul endroit
                        Au grant peril et fortune de mer.

                        Car trop soudain sont illec li oraige,
10                    Les vens divers, si que nulz ne pourroit
                        Eulx efforcier ne prandre le rivaige,
                        N’aler au port ou cilz aler vouldroit
                        Qui entre en mer, et mains homs s’i deçoit,
                        Qui ne puet pas[1] son entente achever
15                    Et qui jamais resister ne pourroit
                        Au grant peril et fortune de mer.

                        Pour ce le doit redoubter qui est saige,
                        Car la paours est grande qu’on y voit.
                        Po y puet homs faire son vasselaige
20                    Quant fortune est. Se le vaissel hurtoit
                        A roche nul, en brief temps periroit
                        Ou les undes le feroient verser :
                        Si fait trop bon obvier, qui pourroit,
                        Au grant peril et fortune de mer.

                        L’envoy

25                    Prince[2], Ysoréz a son temps maintenoit
                        Que sur terre vault[3] mieulx guerre mener.
                        Sur l’eaue non, et eschiver vouloit
                        Au grant peril et fortune de mer.

[1] Ms. par

[2] Ms. Princes

[3] Ms. valoit