Balade 759 : Douce France, pran en toy reconfort (MCXLII)

Balade

                        Douce France, pran en toy reconfort,
                        Resveille toy, soies de joie plaine,
                        Car cilz est nez qui doit par son effort
                        Toy restorer. C’est le roy Charlemaine.
5                      Charles a nom, qui de jour en jour maine
                        Ses osts, pour toy son fil doit recouvrer
                        Ce qu’as perdu, acroistre ton demaine
                        Et conquerir la terre d’oultre mer.

                        Ainsi pieça l’ont destiné li sort
10                    Et la vertu des climas souveraine,
                        C’uns chetivéz doit estre en ton confort
                        Yssus de toy, qui par, puissance plaine,
                        A son pourchas par mocion soudaine
                        Doit moult ce roy par son sens eslever
15                    Et desconfir mainte secte villaine
                        Et conquerir la terre d’oultre mer.

                       Par ces trois yert grant ton renom et fort[1].
                        Les filz de Bruth destruis quoi qu’il aviengne.
                        Charles premier sera puissant et fort,                                              303d
20                    Et le second l’empire d’Alemaigne
                        Doit obtenir, et porter son ensaigne
                        Sur Sarrasins, et ceuls doit subjuguer.
                        Jherusalem doit faire premeraine
                        Et conquerir la terre d’oultre mer.

[1] Ms. ia effort