Balade 758 : Mort, je qui sui l’exemplaire et figure (MCXLI)

Balade

                        ― Mort, je qui sui l’exemplaire et figure
                        D’omme et femme, bestes, poissons, oiseaulx,
                        D’arbres, de flours, de toute nourreture,
                        Me plaing a Dieu de toy tresdesloyaulx,
5                      Quant mourir fais toutes celles et ciaulx
                        Que j’ay creéz et avant leur termine,
                        Jeunes et vielz, foibles, fors, laiz et biaux :
                        Toute vie par toy se determine.

                        ― Il est bien vray, dist la Mort a Nautre,
10                    Que riens n’est fait de toy, tant soi isneaulx,
                        Com longuement se garde, ne qu’il dure,
                        Qu’il ne faille passer par mes raiseaulx
                        En definant. Li Dieux celestiaulx                                                        303c
                        L’a ordonné par sentence divine.
15                    Nature dist : ― C’est jugemens royaulx,
                        Toute vie par toy se [de]termine.

                        ― Mais pas ne suis, ce dist la Mort, trop dure
                        A espargnier jusqu’a long temps les peaulx.
                        Convoitise fait gens pour po d’ordure
20                    Batre, ferir, faire guerre et cembiaux,
                        Ravir, tuer par glaive et par carriaulx
                        Pour terre avoir. Mais d’eulx ainsi deffine
                        Et par excés. ― Tu respons que loyaulx :
                        Tout vie par toy se determine.

                        L’envoy

25                    Princes, vray est que li aages nouveaulx,
                        Par convoiter, de jour en jour decline.
                        Gens se tuent. Mort met raison entr’iaulx :
                        Toute vie par toy se determine.