Balade 757 : Dont vient a tous souveraine noblesce (MCXL)

Autre balade

                        Dont vient a tous souveraine noblesce ?
                        Du gentil cuer, paré de nobles mours,
                        Qui aux vertus non aux vices s’adresce,
                        Qui n’est despis, fel, orgueilleus ne lours ?
5                      Est on noble pour faire villains tours ?
                        Certes nenil : car Frans Vouloirs ne puet
                        Soy excuser des vices ou d’onnours :                                               303b
                        Nulz n’est villains se du cuer ne lui muet.

                        Qui fist les rois, dont vint la gentillesce ?
10                    L’ancien temps et la mondaine cours.
                        Qui les requist ne dont vient leur hautesce ?
                        Dieux le scet bien, qui eslut des meillours
                        Quant les pueples en lieu de leurs menours
                        Requirent roy. Advise cy qui veult,
15                    Et aux vertus aient tuit leurs retours :
                        Nulz n’est villains se du cuer ne lui muet.

                        Les vaillans cuers, hardiz, plains de proesce
                        Et vertueux fist adonc Dieu seignours,
                        Du bien commun leur enseigna l’adresce,
20                    Justice et droit pour les grans et menours,
                        N’il n’entendit faire des loups pastours.
                        Du noble nom, s’il est villain, se duelt
                        L’autre[1] jouist. Donc, qui sent ces coulours,
                        Nulz n’est villains se du cuer ne lui muet.

                        L’envoy

25                    Princes, nulz homs les vertus ne delesse
                        Pour grant estat, car qui les vices queult
                        Cilz est villains, et nobles qui les lesse :
                        Nulz n’est villains se du cuer ne li muet.

[1] Ms. Et l’autre