Balade 756 : Resjouis toy, Jherusalem dolente (MCXXXIX)

Balade

                        Resjouis toy, Jherusalem dolente,                                                     303a
                        Qui tant as eu de tribulacion,
                        Et comme beufs[1] as esté mise en vente,
                        En servitute et persecucion.
5                      Dieux a oy ta lamentacion.
                        A ce coup ci yert le joug desnoué
                        De la misere aux filles de Syon,
                        Tant que chascuns devra crier : ― Noué !

                        Car je voy ja de charité la sente
10                    Et de pité la douce mocion,
                        Amour qui vient, et un fil te presente
                        Pour ton salut et ta redempcion,
                        Qui t’ostera de la subjection
                        Ou cinquante ans a ton peuple noué,
15                    Et lors seras en consolacion,
                        Tant que chascuns devra crier : ― Noué !

                        France, tu es Jherusalem : se sente
                        Et puet sentir estrange nascion,
                        Qui tant as eu de paine et de tourmente
20                    Par les gens Bruth. Mais, a m’entencion,
                        Par cest enfant prandront finicion :
                        Car seigneur doit du secle estre advoué,
                        Tout soubzmettre doit en conclusion,
                        Tant que chascuns devra crier : ― Noué !

                        L’envoy

25                    Princes, pour Dieu le peuple se demente
                        De paix avoir, qui tant vous a loué,
                        Craint et cheri. Faictes que guerre absente,
                        Tant que chascuns devra crier : Noué !

[1] Ms. comment beufs ; Saint Hilaire corrige en comme uns buefs