Balade 755 : Comment sont les cuers endurcis (MCXXXVII)
Autre balade
Comment sont les cuers endurcis
En la principaulté mondaine,
Les oeulx troubléz et oscurcis
Es grans estas que chascuns maine,
5 En despens passans leur demaine,
En nombre de gens et en dons
Excessis, en grace[1] et pardons
Ou pugnicion se deust faire,
Dont la grace de Dieu perdons :
10 Pour Dieu, gardons nous de meffaire.
Veons dont Noblesce jadis
Vint : des vertus. Chose villaine
Des vices dont on est laidis,
Qui villenie en tous admaine.
15 Advisons no nature humaine
Et comment semblables naissons,
Que froit et chaut et mal soufrons
Et que tous convient a mort traire :
Soit clers, laiz, villains, gentilz homs,
20 Pour Dieu, gardons nous de meffaire.
Doubtons que Dieux en paradis
Reserva vengence certaine
Quant peuple orent les roys requis,
Sur tous pugnicion et paine.
25 Les uns destruit, autres[2] aplaine.
Durs aux mauvais, piteux aux bons
Est en tous temps. Ne nous fions
Es pechiéz qui nous sont contraire,
Mais no vie en mieulx reformons : 302c
30 Pour Dieu, gardons nous de meffaire.
L’envoy
Princes, roys et empereris,
Vos predecesseurs sont pourris :
Advisons tous a nostre affaire.
Gardons nos povres esperis,
35 Car les corps sont tantost peris :
Pour Dieu, gardons nous de meffaire.
[1] Ms. graces
[2] Ms. les autres
