Balade 753 : Je viens tous nus, dame, en vostre povoir (MCXXXIV)
Autre balade
― Je viens tous nus, dame, en vostre povoir.
S’ay bien mestier de vostre nourreture.
― Advise donc se je te faiz valoir,
Que tu n’as riens fors les biens de nature,
5 Fragilité, debilité, ordure.
Les biens mondains fuitis et fortunéz
Sont par ma main retoluz et donnéz
Ou il me plaist, a chascun et chascune,
Mais par grace nourris ceuls qui sont nez :
10 Mere de tous soy nommee Fortune,
Qui par pitié vueil pluseurs recevoir,
Et presque touz, dont je prang soing et cure,
Tetter les faiz, aprandre art et sçavoir
Mestier, engin, tant com vie leur dure,
15 Pour eulx chevir, et puis m’appellent dure
Quant je les ay nourris et eslevéz.
Se mes biens prans, dient qu’ilz sont grevéz
Et me claiment desloial, fausse, enfrune.
Ingrades sont, de mes biens gouvernéz :
20 Mere de tous soy nommee Fortune.
Je preste ainsis et despens mon avoir 301c
Pour mettre avant l’umaine creature,
Ce que pluseurs ne scevent concevoir,
Mais leur semble que je leur faiz injure,
25 Quant nourris sont, de prandre ma droiture,
Ce qui mien est. Ceuls sont bien foulz prouvéz,
Quant je les ay de l’ordure levéz,
Qui de mes biens veulent faire commune.
Ravoir les vueil, ne les ay que prestéz :
30 Mere de tous suy nommee Fortune.
L’envoy
Princes et roys, toutes gens, entendéz,
Qui par mon fait aux granz choses tendéz,
Que nulz sanz moy n’en pourroit fournir une.
Pour ce faut il que le mien me rendéz,
35 Quant il me plaist. Ma puissance sentéz :
Mere de touz suy nommee Fortune.
