Balade 752 : Ainsis c’om va pour vir a l’aventure (MCXXXIII)
Autre balade
Ainsis c’om va pour vir a l’aventure,
Par les marches, du monde la noblesce,
Vy sur les champs tresnoble nourreture
D’un grant seigneur qui le gardent de presse,
5 Vieulx et moyens et de bonne jonesse,
Escuirie de beau gouvernement.
Boniface fut la premierement,
La Grue aussi, Olivier le Ferron,
Bertran Boitsart, Louvet, Jehan de Couvrent :
10 Bon fait tel gent tenir en sa maison.
Jehan et Guillot de Tillay[e] n’ont cure
Ne G. de Bueil, Chaumoncel, de paresse
Colart de Bus, ne Jehan de Dreux d’ordure,
Ne Mauvoisin de nul vice qui blesse.
15 Aubert entr’eulx de l’Espine ne cesse
De poursuir. Regnault l’Escrie entent
A tout honeur, et si fait Enguerrent,
D’escurie tous escuiers de nom.
Gerart d’Acy, Beaucourroy : vraiement
20 Bon fait tel gent tenir en sa maison.
D’autre part font du bon vin fourniture
Le seneschal. Petiot, s’on l’oppresse,
Si tire arrier. Paniot paine endure,
En l’office garçon venir ne lesse.
25 Ynglart Marchat rit et puis se courresse. 301b
De Nantoillet Ogier, varlet trenchant
Vy, et Gourle, Betis, mainte autre gent,
Et Jacotin, Minguet, celle saison,
Jeusnes, jolis, bien paillotéz d’argent :
30 Bon fait tel gent tenir en sa maison.
L’envoy
Prince, pluseurs des escuiers delesse
De vostre hostel, qui tendent a prouesse
Et qui sont hors pour acquerir renom.
Améz les bons, monstréz leur vo largesse,
35 Ceuls vous seront escu, chasteau, fortresse[1],
Bon fait tenir tel gent[2] en sa maison.
[1] ms. et forteresse
[2] Saint Hilaire corrige en tel gent tenir
