Balade 750 : Orgueil, despense, oultrageus dons (MCXXXI)

Autre balade

                        Orgueil, despense, oultrageus dons,
                        Que l’en suelt et faire et donner
                        En pluseurs lieux, que nous perdons
                        Sanz cause, par desordonner,
5                      Nous feront fouls larges nommer,
                        Et amenrir nostre finance,
                        Que nous ne sçarons recouvrer
                        Par cuidier et fole plaisance.

                        O le corbaut nous endormons,
10                    Par vaine gloire, a escouter
                        Le louenge de noz vains noms,
                        Dont il se deçut par chanter.
                        Son frommage en laissa aller.
                        Renart le print, le corbaut tance
15                    Qui le sien voit perdre et glanner
                        Par cuidier et fole plaisance.

                        A ceste figure advisons.
                        Et a nous desormais regler
                        Que folement ne despendons.
20                    Grant paine est d’avoir amasser
                        Et brief chose est du despenser,
                        Et plus grief d’avoir recouvrance :
                        Car l’en puet un regne miner
                        Par cuidier et fole plaisance.

                        L’envoy

25                    Princes, chascuns doit adviser                                                          300d
                        Son don, et a cellui viser
                        A qui il donne a la balance,
                        S’il vault et s’il puet proufiter,
                        Moyennement, sanz exceder
                        Par cuidier et fole plaisance.