Balade 749 : Dont venéz vous ? Je viens de Saint Omer (MCXXX)
Autre balade
― Dont venéz vous ? ― Je viens de Saint Omer.
― Or me dittes des nouvelles des roys.
Les avéz veuz aux tentes assembler ?
Arons nous paix de tous poins ceste foys.
5 Dittes nous ent, car vous avéz la vois
D’avoir escript de leurs faiz queroniques.
― Je vous jure, sur Dieu et sur la crois,
Je n’ay riens veu fors le moustier de Liques.
Quant a chose dont je doye parler,
10 Excepté ce que j’ay veu les Anglois
A Saint Omer et venir et aler
Vers la roine d’Angleterre a hault doys,
Et si dit on qu’a la fin de ce mois
La baurra l’en vers Calais, pres des diques,
15 Au roy anglois, puis mon depart d’Artoys,
Je n’ay riens veu fors le moustier de Liques,
Et les chevaulx qu’on y fait establer,
Dont Pompee fut pour tel fait destruis.
N’autre chose ne vous sçay raconter,
20 Fors d’un varlet breton qui par ses doys
.iiiixx. frans, sanz dire « je m’en vois »,
Et un roucin qui estoit bons et friques,
M’a desrobé. N’en cerchant par[1] les boys,
Je n’ay riens veu fors le moustier de Liques. 300c
L’envoy
25 Princes, j’aray bien pou a sermonner,
A escripre, n’a voz faiz ordonner
De ce traicité des noces authentiques,
Et pour ce vueil cy mon euvre finer,
Et en finant puis bien a tous jurer :
30 Je n’ay riens veu fors le moustier de Liques.
[1] Ms. parmy
