Balade 748 : Menton poncé, filz Hermofondricus (MCXXIX)

Autre balade

                        Menton poncé, filz Hermofondricus,
                        Effeminé, deffaulte de nature,
                        Couraige vain, vuit de toutes vertus,
                        De vice plain qui ne tent qu’a ordure,
5                      Non masculin, femenine figure
                        Qui imposer suelz faulx noms sur autruy.
                        Ains es livres de telz gens bien ne luy
                        Quant ilz ne sont en nature parfais,
                        Corrups de corps, de pensee, les truy,
10                    Infeables, desloyaulx et mauvais.

                        Car doublement sont telz gens entendus,                                       300b
                        Homme et femme qui ont la pourtraiture,
                        Femme d’omme, qui doit estre barbus,
                        Homme sanz poil, c’est a chascun laidure.
15                    Eulx encontrer n’est que male adventure,
                        Et leur regart ne doit plaire a nulluy,
                        Car nature double a aucuns sur luy,
                        Aucune aussi, incestes en leurs fais,
                        Usans des deux. De mon temps en congnui,
20                    Infeables, desloyaulx et mauvais.