Balade 747 : Nature est trop au jour d’uy aveuglee (MCXXVIII)
Autre balade
Nature est trop au jour d’uy aveuglee
Et a peché de croire tost encline,
Au dit d’un foul, a chose controuvee,
Ou de nouvel semer fausse dotrine
5 Et tel erreur contre la loy divine,
Es crestiens fait moult a reprimer,
Car Mahomé mist sa loy oultre mer
Par Sergius[1] apostate et prouvoir.
Par faulx moiens fist tout le peuple errer :
10 C’est grant peril de legierement croire.
Si fut Mahom homs de povre lignee,
Larron mourdreux, recept de faulx convive,
Asnes menans, suians mainte contree,
Juifs, crestiens et la gent sarrasine.
15 De trois langues ot asséz la saisine, 300a
Soubtillement sceut la loy ordonner
Et pour le peuple atraire, habandonner
Pechié de char, ce voit on en s’istoire.
Ainsis les fist Mahoms ydolatrer :
20 C’est grant pechié[2] de legierement croire.
Sa secte fut desloyaument plantee,
Dont longuement a duré la racine.
Jherusalem et la Terre sacree,
Crestienté et no loy s’en decline.
25 Et vraiment s’uns homs de douce orine
Au temps qui court sçavoit papelarder,
Mais qu’il sceust bien aux peuples parler,
Nouvelle loy leur mettroit en memoire,
Com Mahom fist pour eulx faire dampner :
30 C’est grant peril de legierement croire.
L’envoy
Princes, chascuns doit en soy regarder
Se ce qu’il oit est vray, possible et cler,
Et s’estre puet selon raison notoire,
Ains qu’il doye son cuer determiner
35 A croire faulx, ou trop fait a blamer :
C’est grant peril de legierement croire.
[1] Ms. sergine
[2] Saint Hilaire rrige en peril
