Balade 745 : Je vueil cesser mon livre de memoire (MCXXV)
Autre balade
Je vueil cesser mon livre de memoire
Ou j’ay escript depuis .xxxii. ans
Du saige roy Charle le quint l’istoire,
Les prouesces que fist li bons Bertrans,
5 Connestable de Guesclin, qui engrans
Fut de garder l’utilité publique,
Et qui maintint si sa guerre punique
Sur les Anglois, que France reformee
En fut et est par mainte belle armee
10 Faitte a son temps, et mourut en la guerre
De son segnour. Moult fut sa mort plouree :
Noble chose est de bon renom acquerre !
Car quant sa mort fut au bon roy notoire, 299a
Moult fut ses duelz et sa complainte grans
15 D’avoir perdu le prince de victoire.
Pour son peuple et pais fut dolens.
Lors en souspirs et en larmes plourans,
Dieu mercia, et service authentique
Fist pour la mort du bon prodomme, si que
20 A Saint Denis fut la tombe ordonnee,
Parfaicte non, mainte aumosne donnee
Pour son salut par devers Dieu acquerre.
Des trois mestiers fut l’ofrande portee :
Noble chose est de bon renom acquerre !
25 Brief temps aprés, de ceste vie en gloire
Passa ly rois qui laissa deux enfans,
Charle[1] et Loys, mais nulz ne pourroit croire
Les grans meschiéz qu’eurent les mendres d’ans,
Rebellions de leur peuple et contens,
30 En bail cheirent, le temps fut lors inique.
Charles regna, a Reins prist sa laurique.
La chose fut asséz bien gouvernee.
Puis son sacre me fut paine[2] donnee
Estans o eulx, d’encerchier et enquerre
35 Et d’escripre leurs faiz par la contree :
Noble chose est de bon renom acquerre !
[1] Ms. Charles
[2] Ms. grant paine
