Balade 744 : Je ne sçay chose qui vaille (MCXXIII)

Autre balade

                        Je ne sçay chose qui vaille
                        Plus pour durer longuement
                        A homme, qu’il ne lui chaille,
                        Fors de vivre liement,
5                      De querir esbatement
                        Honneste et de faire bien,
                        Soy gouverner saigement
                        Et qu’il puist vivre du sien.

                        En trop hault degré ne saille,
10                    Doubte le trebuchement,
                        Si que Envie ne l’assaille,
                        Et vive moyennement.
                        Ainsi sera seurement                                                                          298b
                        Hors du perilleux lien
15                    De servir doubteusement,
                        Et qu’il puist vivre du sien.

                        Au service Dieu ne faille
                        Chascun jour premierement,
                        Et puis a sa besongne aille
20                    Entendre songneusement.
                        Despende espargnablement,
                        De l’autruy ne prangne rien,
                        Porte soy benignement,
                        Et qu’il puist vivre du sien.

                        L’envoy

25                    Prince[1], homs qui vit telement
                        Est de beau gouvernement,
                        Ce dient nostre ancien :
                        Cilz puet vivre longuement,
                        Justement, honnestement,
30                    Et qu’il puist vivre du sien.

[1] Ms. Princes