Balade 743 : Flums naturelz, granz et petiz ruisseaulx (MCXXII)
Autre balade
Flums naturelz, granz et petiz ruisseaulx,
De fontain[e]s procedans des montaignes
Et des plains lieux, eaues a cours ysneaulx
Naissans de mer et par diverses vaines,
5 Tousjours couréz par bas lieux et par plaines,
En retournant[1] dont vous estes venues,
Sanz remonter[2], se vous n’estes tenues
Par aucun art qui vostre force oppresse.
Ainsi courent noz aages soubz les nues :
10 Plourons, chetis, nostre fole jeunesse !
Car de terre faiz, en povres vaisseaulx
Sommes creéz, d’ordes choses villaines
Puz et nourriz, affubléz d’ordes peaulx,
Naissans, crions noz doleurs et noz paines,
15 Aages nous suit et les pensees vaines.
Ja ne seront noz vies retenues,
Tousjours courons et noz charongnes nues
Par mort s’en vont devers nostre maistresse,
Terre, de qui elles sont descendues :
20 Plourons, chetis, nostre fole jeunesse ! 298a
Qui sçavons bien qu’Adam, ne nul de ceaulx
Venuz de lui ne de lignes haultaines,
Princes ne dus, homs vieulz ne damoiseaux
Ne retourna aux aages premeraines.
25 Empereurs, roys qui ont les granz demaines
En fenissant sont leurs vies perdues,
Que josne et viel ont sitost corrompues
Par faire excés, dont maint homme se blesse.
Par pechié sont leurs ames confondues :
30 Plourons, chetis, nostre fole jeunesse !
L’envoy
Prince, au jour d’uy sont pluseurs trop nouveaulx,
Volans des corps trop faire les reviaulx,
Estat tenir et bobant sanz richesse,
Batre, ravir, tuer gens de cousteaulx :
35 Pour Dieu mercy ! en remembrance d’eaulx,
Plourons, chetis, nostre fole jonesse[3] !
[1] Saint Hilaire corrige en Sanz remonter
[2] Saint Hilaire corrige en En retournant
[3] Saint Hilaire corrige en jeunesse
