Balade 742 : Las ! bien sommes glouz et chetis (MCXXI)
Balade contre excés
Las ! bien sommes glouz et chetis
Plus que bestes sanz congnoissance,
Quant nous passons noz appetis
Pour goust de bouche et emplir pance,
5 Dont nous faisons au corps grevance.
Le chief duelt, l’estomac, les rains,
Des excés dont nous sommes plains
Tant que souvent nous fault vomir,
Braire, doloir, getter grans plains,
10 Sanz reposer et sanz dormir.
Les chevaulx, bestes et brebis,
Tout animal en sa substance,
S’ilz passent .iiii. fois ou dix
Par un ruissel, nul ne s’avance
15 De boire, puis qu’a souffisance
A but une foiz. Ceuls sont sains.
Mais sanz raison a nos .ii. mains,
Voulons vins, viande[1] engloutir
A toute heure, s’en sommes vains,
20 Sanz reposer et sanz dormir.
Prenons aux bestes nostre advis,
Laissons nostre fole plaisance
De mangier et boire toudis,
Fors sans plus pour no soustenance.
25 Car on en pert corps et chevance,
On en muert, de l’eure incertains, 297d
Soudainement. Ne soit contrains
L’appetit de le faire ouvrir
Qu’a son gré, ou trop yert destrains
30 Sanz reposer et sanz dormir.
L’envoy
Princes, mengons par atrempance,
Quant faim et soif est en balance,
Moiennement, sanz trop remplir,
Et aprés faisons abstinance
35 Jusques nostre appetit s’avance
Sanz reposer et sanz dormir.
[1] Ms.iviandes
