Balade 741 : Pour signes du ciel que l’en voye (MCXX)

Autre balade

                        Pour signes du ciel que l’en voye,
                        Pour guerres, pour moratlitéz,
                        Pour vengence que Dieux envoie,
                        Tempest, famine, adversitéz,
5                      Conflictes deroys, crudelitéz,
                        Ne pour chose qu’il nous commande,
                        A faire bien, dont c’est pitéz
                        Je ne voy homme qui s’amande,

                        Qui le craingne ne qui le croie
10                    Ne de qui il soit reclaméz
                        Fors en peril. Lors toute voie
                        Est il des pecheurs appeléz,
                        Mais si tost qu’ilz sont respasséz,
                        Ne leur chaut de ce que Dieux mande.
15                    Pis que devant font il asséz :
                        Je ne voy homme qui s’amande.

                        Helas ! pour une courte joye
                        De ce monde sont aveugléz,
                        Ou nulz saiges ne se resjoye,
20                    Qu’a paine yert li justes sauvéz.
                        Qu’est ce, se vous perseveréz,
                        Qui respondra a la demande
                        Du jugement ? Ce jour doubtéz :
                        Je ne voy homme qui s’amande.

                        L’envoy

25                    O justes Dieux, paix, veritéz,                                                               297c
                        Qui tant es des gens despitéz,
                        Doubtons ta justice tresgrande.
                        Trop sommes es maulx delitéz.
                        La fin vient des desheritéz.
30                    Je ne voy homme qui s’amande.