Balade 603bis : Chascuns doit faire son devoir (MCXIX)
Balade[1]
Chascuns doit faire son devoir 297a
Es estas ou il est commis
Et dire a son seigneur le voir
Si que craimte, faveur n’amis,
5 Dons n’amour ne lui soient mis
Au devant pour dissimuler
Raison, ne craimdre le parler
Des mauvais, soit humbles et doulz.
Pour menaces ne doit trambler :
10 On ne puet estre amé de touz.
Ait Dieu tout homme a son pouoir
Devant ses oeulx, face toudis
Ce qu’il devra sanz decevoir.
Lors ne pourront ses ennemis
15 Lui grever, mais seront soubmis
Par cellui qui tout puet garder,
Qui scet les euvres regarder
Des mauvais et bons cy dessoubz,
Pugnir maulx, biens remunerer :
20 On ne puet estre amé de touz.
Car gens qui ont mauvais vouloir
Heent ceuls dont ilz sont pugnis,
Et il vault mieulx la grace avoir
De Dieu, pour gaingnier paradis,
25 Qu’il ne fait des faulx cuers faillis
Qui veulent mentir et flater
Et par leur force surmonter
Les grans cuers et mettre a genoulz.
Faisons bien sanz homme doubter :
30 On ne puet estre amé de touz.
L’envoy
Princes, nul ne doit desirer
Pour le los du monde regner,
Mais des biens de Dieu soit[2] jaloux. 297b
Ses officiers doit [sup]porter
35 S’ilz font bien et les contenter.
On ne puet estre amé de touz.
[1] Pièce identique au f° 248 sous le n° DCCCCLIII
[2] Ms. sont
