Balade 740 : Selon aucuns tresanciens poetes (MCXVII)
Autre balade
Selon aucuns tresanciens poetes
Faingnans d’oyseaulx et de bestes leurs fables,
De Protheus, de Ganimedes fectes,
Et de pluseurs qui sont mal entendables
5 Aux gens communs, sont les diz recitables
Ou le cog doit les Alpes transvoler,
L’aigle et poucins d’icelle subjuguer
Et si rongnier les ongles, queue et eles
Qu’en cheant lors, sanz pouoir relever,
10 Perdra du tout ses plumes natureles.
Combien qu’adonc seront a lui retrettes
Pour contester au cog et ses aidables
Grues, brehiers, cornailles et suettes
Oyseaulx villains, par rivieres nouables
15 Au pié des mons, et grifons conquerables,
Faucons gentilz se venrront la monstrer
Avec le cog, pour lui reconforter,
Et la seront les batailles cruelles,
Maint oysel mort : l’aigle a cel assembler
20 Perdra du tout ses plumes natureles. 296c
Ses niz seront destruiz, les alouettes,
Cignes, paons, tous oyseaulx amiables
Venrront au cog obeir et leurs sectes,
Et lui seront comme a seigneur feables,
25 Lors les prandra comme frans justiçables
Et les menrra avec lui oultre mer,
Et se fera des oiseaulx couronner
Qui par tourbes suivront universeles.
Dont l’aigle lors, qui ne s’est faicte amer
30 Perdra du tout ses plumes natureles.
L’envoy
Princes, li cogs se doit briefment monstrer
Et les trois mons de ses Alpes monter
Ou Hanibal fist, a fer et a peles
Et par grans feux, les chemins pour passer.
35 Donc, se vray est, l’aigle, par ce voler,
Perdra du tout ses plumes natureles.
