Balade 739 : Tant ont esté de voyages emprins (MCXVI)
Autre rondel
Tant ont esté de voyages emprins
En Surie, pour la crestienté,
D’empereurs, roys, roynes, emperis,
Tous crestiens qui la ont conquesté
5 Jherusalem, Acre et mainte cité,
Et neant moins pour la division
Qu’eurent aprés Godefroy de Buillon
Les crestiens fut la terre perdue,
Que Sarrasins ont en subgection :
10 Pour noz pechiéz je voy que tout se mue.
Car Dieu nous a par vengence repris,
Par famine, guerre et mortalité,
Et n’a voulu a nul donner le pris
Du Sepulcre saint avoir acquitté.
15 Mais croy qu’il a aucun habilité
En meurs parfais, par droitte election
Qui des Sains Lieux prandra possession
Par ses vertus, et puissance cremue,
Et delaira son sceptre et region.
20 Pour noz pechiéz je voy que tout se mue.
Et selon ce que j’ay veu es escrips
Dedenz brief temps sera l’omme apresté
Avec lequel doit estre Jhesucris :
Qui tant lui a de sa grace presté
25 Que le pais sera prins et gasté
Des mecreans, tout mis en union 296b
Et flourira saincte religion
Qui des long temps a mal esté tenue,
En reformant toute devocion :
30 Pour noz pechiéz je voy que tout se mue.
L’envoy
Princes, chascun quiere remission
De ses meffaiz, par satisfacion,
Sanz plus cheoir en tel desconvenue,
Sachans que Dieu fist no redempcion :
35 Quel mort soufrit et quelle passion !
Pour noz pechiéz je voy que tout se mue.
