Balade 738 : Puis que Rolant et Olivier mouru (MCXV)
Balade
Puis que Rolant et Olivier mouru,
Les .xii. pers, la grant roy Charlemaine,
Crestienté plaint leur mort et dolu,
Et France aussi ne tint puis tel demaine
5 Qu’elle faisoit, car prince n’est qui maine
Guerre ne gens contre les Sarrasins
Pour nostre foy. On ne quiert que flourins,
Or et joyaulx, faire les tresors grans :
Mais se Charles regnassent et Pepins,
10 Encor fust il Oliviers et Rolans.
Ceuls a leur temps furent plains de vertu,
Ceuls pour honeur quirent traveil et paine,
Ceuls pour la foy et le peuple menu
Mirent leur sang, ceuls conquirent Espaigne
15 Des mescreans, Saxonne et Acquitaine,
Et acrurent de leur regne les fins,
Toute Ytale, Disier, roy des Latins,
Et nous sommes lasches et recreans :
Mais se Charles regnassent et Pepins,
20 Encor fust il Oliviers et Rolans.
Ceuls conquistrent au fer et a l’escu
Les provinces, l’empire d’Alemaigne,
Et mains pais que nous avons perdu
Par trop vouloir avoir la pance plaine,
25 De convoitier, de viande mal saine,
De grant bobans, de laissier orphenins
Les nobles cuers qui deussent les chemins
Faire et cerchier. Nul n’en va sur les champs,
Mais se Charles regnassent et Pepins,
30 Encor fust il Oliviers et Rolans.
L’envoy
Princes, je voy tous les cuers estre enclins 296a
A convoitier, rapine et larrecins.
Chetivetéz estre en mains lieux courans,
Et qu’on se fait hair de ses voisins,
35 Soy rebouter, estre appeléz meschans,
Mais se Charles regnassent et Pepins,
Encor fust il Olivier et Rolans.
