Balade 737 : A tous les roys et princes de la terre (MCXII)
Autre balade
A tous les roys et princes de la terre,
Sarrazins, Juifs et de Crestienté,
Se vous vouléz l’amour de Dieu acquerre
Et conquerir la pardurableté
5 De voz regne, Justice et Quité,
Rigueur aussi, ou elle appartendra,
Faictes tenir, car qui ne la tendra
Sanz fiction, et qu’elle soit coulice,
Dedens brief temps [sa] region fauldra :
10 Faictes par tout garder Loy et Justice.
Depuis l’aage second, qui y veult querre,
Que Nembroth lors fist celle grant cité,
Babilonne, cilz premiers esmut guerre,
Car geans fut de grant crudelité,
15 A Justice ot des lors affinité.
Alixandre, qui bien garde y prandra,
La fist et tint. Moyses, qui passa
Son peuple hebrieu en desert, fut propice
De justicier [a] chascun qui erra :
20 Faictes par tout garder Loy et Justice.
Romme sur tous tint la clef et la serre
Des maulx pugnir, d’amour [et] d’unité.
Au commun bien voult le monde conquerre[1]
Par ses vertus, par son hostilité[2]
25 Et tant qu’elle ot ces poins en amisté,
Comme dame sur le monde regna, 295b
Mais aussi tost qu’elle les delaissa
Et que chascuns prinst en soy avarice,
Romme dechut quant droiture y cessa :
30 Faictes par tout garder Loy et Jusice.
L’envoy
Princes, li roys souverains ordonna
Justice a tous, et aux princes manda
De la tenir comme hault benefice.
Qui ne le fait sa vengence encourra
35 Et au derrain terre et pais perdra :
Faictes par tout garder Loy et Justice.
[1] Ms. conquerir
[2] Ms. hostilpte
