Balade 736 : Je voy toute restrinction (MCXI)
Balade
Je voy toute restrinction
Faire sur le fait de justice,
Le subgiet dominacion
Avoir sur le chief de l’office,
5 Le serf franchir, lever le nice,
Et le noble France asservir
Et son justissable servir
Par le moien d’arismetique
Qui deust arpenter et couvrir :
10 Autre science n’a pratique.
Les loys sont en destruction.
Il fault que Franc Vouloir perice,
Les .vi. ars, leur instruction,
Excepté celle ou est tout vice,
15 Qui compte et giette par malice
L’argent par convoiteux desir.
Tel art fait les vertus gesir
Soubz ses piéz, par sa voie inique,
Se veult sur toute enrichir :
20 Autre science n’a pratique.
Soubmis a a sa dition
Lune et souleil, par son esclipce,
Et toute generacion
La sert et donne benefice.
25 Celle fait tout grantedifice,
Chasteaulx, maisons. Celle acquerir
Veult terres par tout, seignourir[1]
En destruisant le bien publique
Par deffault de bien advertir :
30 Autre science n’a pratique.
L’envoy 295a
Princes, mainte perdicion
Vient par deffault d’election
De saige gent, par voie oblique,
Es estas, par affection :
35 Com cest art sanz parfection,
Autre science n’a pratique.
[1] Ms. et seignourir
