Balade 735 : Je ne vueil plus estre bailli (MCX)
Autre balade
― Je ne vueil plus estre bailli. 294c
― Pour quoy ? ― Pour ce que de present
Il est contre loy establi
Que le maistre serve au servant.
5 ― Je ne vous entens pas. Comment ?
― C’est a dire qu’un receveur
De bailliaige ou [un] procureur
Les baillis contrerolera,
Et s’ilz vont hors veoir le leur,
10 Chascuns d’eulx ses gaiges perdra.
― Procureur, receveur aussi
Sont ilz restrains pareillement ?
― Nenil, car de l’or sont ami,
Ne leur chaut s’ilz sont negligent,
15 Tousjours les fait finer l’argent.
Aux baillis monstrent grant rigueur,
Sanz paier en ont du pieur.
Saiges est qui s’en ostera,
Car s’aucuns va veir son labour[1],
20 Chascuns d’eulx ses gaiges perdra.
― C’est bien le rebours que je vi,
Car chascun aloit franchement
Du bon temps, sanz estre asservi.
On ne retraint pas le convent
25 Ou il a .iii. foiz trop de gent
Qui happent le fruit et la fleur,
Mais l’en garde a un seul rigueur
Qui plus qu’eulx touz besongnera :
S’a nopces vont bailli ou pleur,
30 Chascuns d’eulx ses gaiges perdra.
L’envoy
Prince, Entendement est failli
Quant Franc Vouloir est assailli,
Et foulz est cilz qui le laira
Pour argent serf partir de li.
35 Se baillis s’en vont, d’argent fy ! 294d
Chascuns d’eulx ses gaiges perdra.
[1] Saint Hilaire corrige en labeur
